آئندہ ماہ زیارات پر جانیوالے زائرین کو بحری راستہ سے ایران پہنچایا جائیگا

وزارت خارجہ کے ذرائع کے مطابق اس حوالے سے زائرین کو بحری کروز کے ذریعے کراچی سے چابہار پہنچایا جائے گا۔ تاہم ابھی چابہار سے آگے زائرین کو مقامات مقدسہ تک پہنچانے کے لئے سہولیات کی فراہمی کے حوالے سے ایرانی حکومت سے بات چیت جاری ہے۔ اس بات چیت کے حوالے سے دفترخارجہ نے ابھی کوئی تفصیلات مہیا نہیں کی ہیں تاہم جب وفاقی وزیر برائے بندرگاہ و جہاز رانی کامران مائیکل سے رابطہ کیا گیا تو انہوں نے ان روابط کی تصدیق کرتے ہوئے کہا کہ کراچی سے ایرانی بندرگاہ چابہار تک سفر کے حوالے سے تو معاملات طے ہو چکے ہیں۔ تاہم چابہار سے آگے کے سفر کے لئے وزارت خارجہ اور ایرانی حکام رابطہ میں ہیں۔ واضح رہے کہ اس بحری راستہ کے لئے خصوصی پسنجر کروز سروس شروع کی جا رہی ہے۔ اس سارے سفر میں 2 دن سے لے کر 48 گھنٹے صرف ہوں گے۔ جس کے بعد زائرین بحفاظت اپنی منزل تک پہنچ پائیں گے۔ اس سہولت ک ذریعے زائرین کو ایران و عراق زیارات پر جانے کے لئے ایک محفوظ راستہ فراہم کرنے کی غرض سے یہ اقدامات اُٹھائے گئے ہیں۔ اس سفر میں ہر مسافر 120 کلو سامان اپنے ہمراہ لے جا سکے گا جبکہ اس کے کرایے بھی ہوائی سفر کے کرایوں کی نسبت کم ہوں گے۔ جس کے باعث کم آمدنی والے زائرین کو بھی زیارات کا موقع میسر آئے گا۔