اسلامی جمہوریہ ایران کے وفد نے کشمیر میں سیلاب سے متاثرہ عوام کے حالات اور ان کی مدد کی راہوں کا جائزہ لینے کے لئے آج ہندوستان کےزيرکنٹرول کشمیر کا دورہ کیا اور متحدہ مجلس علماء کے سربراہ میرواعظ عمر فاروق سمیت مختلف رہنماؤں سے ملاقات کی۔ اس موقع پر رہبرانقلاب اسلامی کی ہدایت پر کشمیرکا دورہ کرنے والے وفد نے میر واعظ عمرفاروق سے ملاقات میں کہا کہ رہبرانقلاب اسلامی، کشمیریوں کے غم میں برابرکے شریک ہیں اور بارگاہ خداوندی میں اس مصیبت سے نجات کے لئے دعا گو ہيں۔ اس ملاقات میں متحدہ مجلس علماء کے سربراہ میرواعظ عمر فاروق نے وفد کا شکریہ ادا کرتے ہوئے کہا کہ اسلامی جمہوریہ ایران وہ واحد ملک ہے جس نے مصیبت کی اس گھڑی میں کشمیری عوام کی مدد کے لئے وفد کشمیر بھیجا ہے۔ میرواعظ عمر فاروق نے رہبر انقلاب اسلامی حضرت آیت اللہ خامنہ ای کے اس اقدام کو سراہتے ہوئے دوسرے اسلامی ممالک سے بھی اپنے وفود کشمیر روانہ کرنے کی تاکید کی تاکہ دنیا کو کشمیری عوام کے مسائل کا اندازہ ہو۔ میرواعظ عمرفاروق نے حکومت ہندوستان سے مطالبہ کیا کہ وہ کشمیر کا دورہ کرنے والے وفود کی راہ میں کسی طرح کی رکاوٹ نہ ڈالے۔
