ملک بھر میں یوم پاکستان آج ملی جوش و جذبے سے منایا جائے گیا

وفاقی دارالحکومت اسلام آباد میں تینوں مسلح افواج کی شاندار پریڈ کا انعقاد کیا جائے گا۔

ملک بھر میں یوم پاکستان آج ملی جوش و جذبے سے منایا جائے گا جب کہ اس موقع پر وفاقی دارالحکومت میں صبح کا آغاز 31 اور صوبائی دارالحکومتوں میں 21، 21 توپوں کی سلامی سے ہوگا۔ 

آج ملک بھر میں یوم پاکستان انتہاپسند اوردہشت گرد قوتوں کوشکست دے کر ملک کی ترقی ، خوشحالی اور استحکام کے عزم کے ساتھ منایاجائے گا، صبح کا آغاز وفاقی دارالحکومت اسلام آباد میں 31 اور صوبائی دارالحکومتوں میں 21، 21 توپوں کی سلامی سے ہوگا جب کہ اس موقع پر ملک بھر میں عام تعطیل کا اعلان کیا گیا ہے۔

یوم پاکستان پر تمام سرکاری اورنجی عمارتوں پر قومی پرچم بھی لہرایا جائے گا، نماز فجر کے بعد ملک بھرمیں قوم کی خوشحالی اورسلامتی کی دعائیں مانگی جائیں گی جب کہ اسلام آباد میں تینوں مسلح افواج کی شاندار پریڈ کا انعقاد کیا جائے گا جس میں صدر مملکت ممنون حسین، وزیراعظم ، وفاقی وزرا ، مسلح افواج کے سربراہان اور دیگر حکام بھی شریک ہوں گے۔ دوپہر میں ایوان صدر میں تقسیم اعزازت کی تقریب ہوگی جس میں صدر ممنون حسین مختلف شعبوں میں نمایاں خدمات انجام دینے والی شخصیات کو ایوارڈ اور تمغے بھی دیں گے۔

یوم پاکستان کی مناسبت سے تقاریب کے لیے ملک بھر میں سیکیورٹی کے خصوصی انتظامات کیے گئے ہیں جب کہ اسلام آباد میں یوم پاکستان کی پریڈ کے موقع پر انتہائی سخت سیکیورٹی انتظامات کیے گئے ہیں جس کے تحت موبائل فون سروس بھی معطل کی جائے گی۔

دوسری جانب یوم پاکستان پر اپنے پیغام میں وزیراعظم نوازشریف نے كہا ہے كہ دہشت گردی اور شدت پسندی كی شكل میں بے مثال خطرات اور چیلنجز كا سامنا ہے تاہم ہم نے ان خطرات كو شكست دینے كا پختہ عزم كرركھا ہے اورہم اپنی سرزمین وطن سے جلد ہی دہشت گردی اور شدت پسندی كا مكمل خاتمہ كردیں گے۔