گلگت بلتستان سکائوٹس کی خدمات اور قربانیاں ہمارے لئے باعث فخر ہیں،کمانڈر سپیشل سکیورٹی ڈویژن میجر جنرل عابد رفیق کی وزیراعلیٰ سے ملاقات

کمانڈر سپیشل سکیورٹی ڈویژن نے مزید بتایا کہ سی پیک منصوبے کی فول پروف سکیورٹی کیلئے پاک فوج حکومت کے شانہ بشانہ اور پرعزم ہے شاہراہ قراقرم اور گلگت بلتستان میں چین کے تعاون سے جاری بڑے منصوبوں کی سکیورٹی کیلئے گلگت بلتستان سے ریٹائرڈ ہونے والے فوجیوں کی خدمات حاصل کی جائیں گی جس کیلئے تیزی سے کام جاری ہے جبکہ سپیشل پولیس یونٹ کے قیام پر بھی غور جاری ہے سپیشل پولیس یونٹ میں ان افراد کو ترجیح دی جائے گی جو قراقرم سکیورٹی فورس کا حصہ رہ چکے ہیں اور ان کے تجربات سے استفادہ حاصل کیا جائے گا کمانڈر کا مزید کہنا تھا کہ گلگت بلتستان سکائوٹس کی خدمات اور قربانیاں ہمارے لئے باعث فخر ہیں جی بی سکائوٹس بھی سی پیک منصوبے کی سکیورٹی میں اہم کردار ادا کر رہی ہے اس فورس کو بھی مزید فعال بنانے کیلئے ہم دن رات کوشاں ہیں اور گلگت بلتستان کی صوبائی حکومت نے قیام امن کیلئے جو اقدامات کیے ہیں وہ بھی قابل قدر ہیں اور ہم پرامید ہیں کہ ہماری طرف سے غیرملکی خصوصاً چین سے آئے سرمایہ کار بہترین سکیورٹی میں اپنے امور سرانجام دے سکیں گے۔ وزیراعلیٰ گلگت بلتستان نے اس موقع پر کہا کہ میری حکومت پر بہت بھاری ذمہ داری ہے مگر الحمد اللہ ہم نے پاک افواج کے تعاون سے اس ذمہ داری کو اب تک بخوبی نبھایا اور مستقبل کیلئے بھی پرعزم ہیں قراقرم ہائی وے سمیت گلگت بلتستان کے تمام میگاپراجیکٹس پر کام کرنے والوں کی جان و مال کے تحفظ کی ذمہ داری ہماری اولین ترجیح ہے انہوں نے سپیشل پولیس یونٹ میں قراقرم فورس سے وابستہ رہنے والے افراد کو ترجیح دینے کے فیصلے کو سراہتے ہوئے خوشی کا اظہار کیا اور اسے بڑا اقدام قرار دیا۔ادھروائس چیف آف ایئرسٹاف ایئرمارشل اسد لودھی نے وزیراعلیٰ گلگت بلتستان حافظ حفیظ الرحمن سے ایک تفصیلی ملاقات کی جس میں گلگت تا نلتر دو ارب ستر کروڑ کی لاگت سے بننے والے ایکسپریس وے منصوبے کی باضابطہ منظوری پر ایئرمارشل نے وزیراعلیٰ کی کاوشوں کو سراہتے ہوئے کہا کہ مجھے حاصل ہونے والی معلومات کے مطابق گلگت بلتستان میں گزشتہ دو برسوں میں ریکارڈ ترقیاتی و فلاحی منصوبوں کا آغازہوا اور حکومت وہاں بنیادی مسائل پر توجہ دے رہی ہے انہوں نے کہا کہ نلتر کا ماسٹر پلان پاکستان ایئرفورس نے تیار کر لیا ہے جو اگلے ایک ہفتے میں صوبائی حکومت کے ساتھ شیئر کریں گے ماسٹر پلان کے مطابق نلتر میں ہوٹلنگ ، کمرشل ایریاز اور پارکنگ ایریاز پر خصوصی توجہ دی جا رہی ہے تا کہ یہاں آنے والے سیاحوں کی کثیر تعداد کو زیادہ سے زیادہ سہولیات اور آسانیاں پیدا کی جا سکیں انہوں نے کہا کہ نلتر گلگت بلتستان کے خوبصورت مقامات کا لازمی جز ہے یہاں گرمیوں اور سردیوں میں سیاحوں کا رش رہتا ہے جبکہ ایئرفورس کے تعاون سے ہونے والی کھیلوں کی سرگرمیوں میں بھی لوگوں کی شرکت میں ہر سال اضافہ ہو رہا ہے ایکسپریس وے کی تعمیر اور ماسٹر پلان بن جانے کے بعد یہاں آنے والے سیاحوں کی تعداد میں کئی گنا اضافہ ہو گا جو ملکی معیشت خصوصاً گلگت بلتستان کے لئے انتہائی مفید ہے انہوں نے مزید بتایا کہ پاکستان ایئرفورس نلتر اور سیاحت کے علاوہ بھی گلگت بلتستان میں دیگر شعبوں میں بھی اپنا مثبت کردار ادا کرے گی اور صوبائی حکومت کے ساتھ مل کر ترقیاتی و فلاحی کاموں میں تعاون کیا جائے گا۔ وزیراعلیٰ نے اس موقع پر پاکستان ایئرفورس کا شکریہ ادا کرتے ہوئے کہا کہ انہوں نے نلتر جیسے اہم مقام کو بہتر سے بہتر اور خوبصورت اور خوبصورت بنانے میں مثالی کردار ادا کیا ماسٹر پلان منصوبہ انتہائی اہمیت کا حامل ہے اس سے گلگت بلتستان کی سیاحت کی انڈسٹری کو مزید فائدہ ہو گا اور یہاں کے عوام کی زندگیوں میں مثبت تبدیلی آئے گی انہوں نے یقین دلایا کہ صوبائی حکومت پاکستان ایئرفورس کے ساتھ مل کر گلگت بلتستان کی ترقی کیلئے کوشاں ہے اور باہمی روابط کو مزید مضبوط کیا جائے گا۔