صیہونی حکومت سب سے بڑا خطرہ ہے اور بعض حلقے اس خطرے کو نظر انداز کررہے ہیں

انہوں نے کہا کہ صیہونی حکومت کے خلاف جاری مزاحمت کا حزب اللہ کا شام کی جنگ میں شامل ہونے یا انیس سو بیاسی اور دوہزار چھے کی جنگوں سے کوئي تعلق نہیں ہے بلکہ یہ مزاحمت، سرزمین فلسطین پر صیہونی حکومت کے قیام سے شروع ہوئي ہے۔ سید حسن نصراللہ نے کہا کہ مزاحمت کے بارے میں ہمیشہ قومی اتفاق رہا ہے اور حزب اللہ ماضی کی نسبت بہت زیادہ طاقتور ہوچکی ہے اور اسکی یہ ترقی، تمام شعبوں میں دیکھی جاسکتی ہے۔ انہوں نے کہا کہ حزب اللہ، ملت لبنان اور وطن اور اپنی سرزمین کے دفاع کے لئے ہمیشہ آمادہ و مستحکم طور پر باقی رہے گي۔ سید حسن نصراللہ نے کہا کہ حزب اللہ کی ڈیٹرینٹ طاقت کے طفیل میں صیہونی حکومت دوبارہ حملے کرنے کی جرات نہیں کرے گی اور سب سے زیادہ اہمیت اس بات کی ہے کہ صیہونی حکومت، حزب اللہ کی طاقت و توانائي سے بخوبی واقف ہے۔ انہوں نے شام کے بحران کی طرف اشارہ کرتے ہوئے کہا کہ شام کا بحران بیرونی مداخلت کی وجہ سے اس مرحلے تک پہنچا ہے اور حزب اللہ اور اسکی موجودگي سے اس کا کوئي تعلق نہیں ہے۔ سید حسن نصراللہ نے کہا کہ حزب اللہ نے ابتدا ہی سے شام کے بحران کے سیاسی راہ حل پرتاکید کی ہے لیکن کچھ عرب حلقوں نے شام کی حکومت کی سرنگونی پر اصرار کیا۔