ایران کی دسویں پارلیمنٹ کے نام رہبر انقلاب اسلامی کا پیغام

ایران کی پارلیمنٹ مجلس شورائے اسلامی کے دسویں دور کا آغاز ہفتے کی صبح کو رہبر انقلاب اسلامی آیت اللہ العظمی خامنہ ای کے اہم پیغام سے ہوا۔
رہبر انقلاب اسلامی آیۃ اللہ العظمی خامنہ ای نے ہفتے کے روز دسویں پارلیمنٹ مجلس شورائے اسلامی کی افتتاحی تقریب کے نام اپنے پیغام میں، دسویں پارلیمانی انتخابات میں عوام کی بھر شرکت پر شکریہ ادا کرتے ہوئے فرمایا: دسویں پارلیمنٹ کے نمائندوں سے بھی توقع کی جاتی ہے کہ وہ انقلابی اور اسلامی معیاروں اور اصولوں کے مطابق عالمی سامراجی طاقتوں کی گھناؤنی سازشوں کا ڈٹ کر مقابلہ کریں ، قومی اور ملکی مفادات کےتحفظ کے سلسلے میں اپنی قانونی اور آئینی ذمہ داریوں کو پورا کریں ، ایرانی عوام کی خدمت کو اپنا نصب العین قراردیں اور مزاحمتی اقتصادی پالیسیوں کو عملی جامہ پہنانے کے سلسلے میں حکومت اور دیگر اداروں کے ساتھ بھر پور تعاون کریں۔

رہبر انقلاب نے اس پیغام میں فرمایا کہ ایرانی قوم نے پارلیمانی انتخابات میں وسیع پیمانے پر شرکت کے ذریعے اسلامی جمہوری نظام کے ساتھ اپنی دیرینہ بیعت کا اعادہ کیا اور دشمنوں اور بدخواہ عناصر کو ایک بار پھر مایوس کردیا- آیۃ اللہ العظمی خامنہ ای نے فرمایا کہ علاقے اور دنیا کے طوفانی حالات اور تسلط پسندوں اور ان کے حامیوں کی سازشوں نے اسلامی جمہوریہ ایران کو ماضی سے زیادہ پیچیدہ صورتحال سے دوچار کردیاہے- آپ نے فرمایا کہ ایسے حالات سے مقابلے کےلئے ہوشیاری، پختہ عزم و ارداے اور تمام حکام کی جانب سے جدت عمل کی ضرورت ہے-

واضح رہے کہ ہفتے کے روز رہبر معظم انقلاب اسلامی حضرت آیت اللہ العظمی خامنہ ای کے پیغام کے ساتھ ، اور صدر حسن روحانی، خبـرگان کونسل کے سربراہ آیت اللہ جنتی ،مجمع تشخیص مصلحت نظام کونسل کے سربراہ آیت اللہ ہاشمی رفسنجانی ، حجۃ الاسلام والمسلمین سید حسن خمینی اور دیگر اعلی سول اور فوجی حکام کی موجودگی میں اسلامی جمہوریہ ایران کی دسویں پارلیمنٹ کا آغاز ہوگیا ہے۔

پارلیمنٹ کی افتتاحی تقریب میں ایران کے اعلی سول اور فوجی حکام کی موجودگی میں ارکان پارلیمنٹ نے حلف اٹھایا۔

پارلیمنٹ کی افتتاحی تقریب سے صدر حسن روحانی نے بھی خطاب کرتے ہوئے کہا کہ پارلیمنٹ اور حکومت کا باہمی تعاون مضبوط اور مستحکم طریقے سےجاری رہےگا۔